Алматы қаласының Алмалы аудандық сотында адам өліміне әкелген жол апатына кінәлі деп айыпталған автобус жүргізушісіне қатысты қылмыстық іс қаралды, деп жазады inbusiness.kz қалалық соттың ресми сайтына сілтеме жасап.
Сот 2022 жылдың 8 қарашасында сағат 14:00 шамасында сотталушы А. Абылай хан көшесі бойымен оңтүстік бағытта № 98 автобусты басқара отырып, жол қозғалысы ережелерін елемей, бағдаршамның тыйым салынған қызыл шамына өтіп кеткенін анықтады. Салдарынан Төле би көшесімен келе жатқан №201 автобуспен соқтығысқан.
Жол апаты салдарынан №98 автобустың жолаушылары құлап, жәбірленуші И. автобустың астына түсіп, алған дене жарақатынан көз жұмды. Ал, жәбірленуші К. денсаулығына ауыр зиян, жәбірленуші Ш.-ге орташа зиян келген.
Сотталушы А. өз кінәсін мойындамай, өзін ақтауды сұрады.
"Сот Қылмыстық кодекстің 345-бабы 3-бөлігі бойынша сотталушы А.-ны кінәлі деп танып, оны 2 жыл 6 ай мерзімге бас бостандығынан айырды. Сонымен қатар 5 жыл мерзімге көлік құралын басқару құқығынан айыру түрінде қосымша жазаны тағайындады. Сотталушының жазасын жеңілдететін жағдай ретінде оның асырауында 3 кішкентай баланың болуы ескерілді", - делінген хабарламада.
Сондай-ақ, зардап шегушілер Ш.және К. пайдасына моральдық шығын ретінде әрқайсысына 2 млн теңгеден, Ш.-ның пайдасына 323 885 теңге өндірілді.
Сот үкімі заңды күшіне енген жоқ.
