Алматы қаласының мамандандырылған ауданаралық сотына тұрғын үй кешендерінің біріндегі күзетшіні өлтіру дерегіне қатысты қылмыстық іс келіп түсті, деп хабарлайды inbusiness.kz сайты.
Сотталушы Қылмыстық кодекстің 99-бабының 2-бөлігінің 5) тармағы (аса қатыгездікпен кісі өлтіру) және 147-бабының 5-бөлігі (адамның жеке өмірі туралы ақпаратты оның келісімінсіз тарату) бойынша айыпталып отыр.
"Бірінші эпизод бойынша сотталушы 2024 жылдың наурыз айында Алматыдағы тұрғын үй кешендерінің бірінің күзетшісін өлтірді деп айыпталуда. Сонымен қатар тергеу сотталушыны өзінің танысы А-ға қатысты әлеуметтік желілер арқылы интимдік сипаттағы бейнероликтерді таратқаны үшін айыптайды", – делінген хабарламада.
Айта кету керек, осыған дейін Алматыдағы "Меркур Таун" тұрғын үй кешенінде болған оқиғадан соң 42 жастағы азамат қаза тапқанын жазғанбыз. Марқұмның артында 3 баласы қалды. Ер адамды өлтірді деп айыпталған бұзақы депутаттың ұлы болып шықты.
