5 жасқа дейінгі балалардың өлім коэффициенті 2%-ға төмендеді. Бұл туралы Денсаулық сақтау министрі Ажар Ғиният айтты, деп жазады inbusiness.kz.
Ведомство басшысының сөзінше, биылғы 8 айдың қорытындысы ана өлімінің көрсеткіші 100 мың тірі туғандарға шаққанда 11,4-ке дейін төмендегенін көрсетіп отыр.
"Білікті медицина қызметкерлері қабылдаған босану үлесі – 99,7%. 2022 жылы неонаталдық өлім, яғни 1 айға дейінгі нәресте өлімінің көрсеткіші 2021 жылмен салыстырғанда 11%-ға төмендеді. Осы жылдың 7 айының қорытындысы бойынша бұл көрсеткіш өткен жылдың сәйкес кезеңінің мәнімен салыстырғанда 11,9%-ға азайды. 5 жасқа дейінгі балалардың өлім коэффициенті 2%-ға төмендеді", - деді министр Парламенттік комиссия отырысында.
Еске салу керек, осыған дейін елдің дамуындағы ұлттық мақсаттар мен міндеттердің іске асырылуы бойынша Парламенттік комиссия құрылатынын жазған болатынбыз.
