9 қарашада Астанада "Тәуелсіздік. Әдебиет. Қаламгер" тақырыбымен еліміздің шығармашылық зиялыларының форумы өтеді.
"Көрме" орталығында өтетін форум жұмысына Қазақстан Республикасы Мәдениет және спорт министрлігінің өкілдері, белгілі ақын-жазушылар, еліміздің зиялы қауым өкілдері, білім және мәдениет мекемелерінің қызметкерлері, кітапханашылар, оқырмандар және БАҚ өкілдері қатысады.
Форумның негізгі міндеттері – қоғамның әлеуметтік белсенділігі мен шығармашылықтарын дамыту құралы, мәдениеттің маңызды элементі ретіндегі оқуға жан-жақты қолдау көрсету, қазақстандық ақын-жазушылардың шығармашылығын насихаттауға және оқырмандардың сүйікті авторларын анықтауға септесу.
Форумда "қазіргі қоғамдағы әдебиеттің рөлі мен орны", "адам өміріндегі Кітаптың құндылығының мән-маңызы", "Кітапхана Қазақстанның шығармашылық интеллигенциясы өкілдерін бірлестіру орталығы ретінде", "Кітапхана – Кітап – Жазушы" тәрізді тақырыптар қарастырылады.
Қазақстандағы Тәуелсіздік жылдарында талантты ақын-жазушылардың тұтас тобы пайда болды, қаламгерлер қазақ әдебиетіндегі салт-дәстүрді әрі қарай жалғастыра отырып, Отанымыздың Тәуелсіздігін қалыптастыру мен дамытуға үлес қосатын болады. Оқырмандар арасында танымал авторларды анықтау мақсатында Қазақстан Республикасы Ұлттық академиялық кітапханасының Facebook парақшасында 3 қарашадан 7 қарашаға дейін "Тәуелсіздік. Әдебиет. Қаламгер" тақырыбындағы байқауға онлайн-дауыс беру жүргізілді.
Форумда ҚР Тәуелсіздігінің 25 жылдығына арналған Байқау қорытындысына қарай мынадай номинациялар: "Үздік жазушы", "Үздік ақын", "Үздік балалар жазушысы", "Үздік балалар ақыны", "Үздік драматург" бойынша 25 конкурсант марапатталады. Сондай-ақ басқа да байқау қатысушыларына сертификаттар табыс етіледі.
Форумды Қазақстан Республикасы Мәдениет және спорт министрлігінің қолдауымен Қазақстан Республикасы Ұлттық академиялық кітапханасы ұйымдастырып отыр.
