Бүгін Доссор - Құлсары - Бейнеу - Сайөтес - Шетпе - Жетібай - Ақтау автожолындағы жолға еріген қар суының тасқынына байланысты көлік құралдарының барлық түрлері үшін қозғалыс шектелді.
"Қазіргі уақытта тасқын суды бұру және жол жиегіндегі бөгетті нығайту бойынша іс-шаралар жүргізілуде. Автожол мен жер жамылғысының бұзылу қаупі жоқ. 10 адам және 4 бірлік техника жұмылдырылды. Доссор - Құлсары - Бейнеу - Сайөтес - Шетпе - Жетібай - Ақтау жолдарының 4-119 шақырым аралығы қамтылды. Доссор-Құлсары учаскесі көлік құралдарының барлық түрлері үшін шектеулі", - деп хабарлайды "ҚазАвтоЖол "ҰК" АҚ.
Атырау облысы ТЖД-да өзен деңгейінің көтерілуіне және трассаның тасқын сулармен су басуына байланысты облыстық маңызы бар Доссор - Құлсары - Ақтау (Доссордан Құлсарына дейін) автожолдарының 4 км-119 км аралығында көліктің барлық түрлері үшін қозғалыс жабылғанын растады.
"Аталған учаскеде ескерту белгілері орнатылған. Атырау облысы ТЖД су тасқыны кезеңінде қауіпсіздікті сақтауды сұрайды",-деп атап өтті ведомствоның баспасөз қызметі.
