Атырау облысында алғашқы жартыжылдықта тауарлар өткізу көлемі ұлғайды. Бұл туралы ақпаратты ҚР ұлттық экономика министрлігінің статистика комитеті хабарлайды.
2017 жылдың қаңтар-маусымында бөлшек сауда тауар айналымы 120 075 млн теңгені құрады, бұл көрсеткіш 2016 жылдың сәйкес кезеңімен салыстырғанда (салыстырмалы бағамен) 1,7% артық.
Жеке меншік кәсіпорындардың және жеке кәсіпкерлердің тауар өткізу айналымы 110859,9 млн теңге (92,3%), басқа мемлекеттердің, олардың заңды тұлғаларының және азаматтарының меншігінен 9215,1 млн теңге (7,7%) құрады.
2017 жылдың қаңтар-маусымында облыстың көтерме тауар айналымы 261974,4 млн теңге болды, 2016 жылдың қаңтар-маусым айларымен салыстырғанда 56,6% өсті. Тауар айналым көлемінің басым көпшілігі (көтерме сауда көлемінің 72,3%) шетелдік сектор арқылы жүзеге асырылды.
2017 жылдың қаңтар-маусымында бөлшек тауар айналымының қомақты өсуі өткен жылғы сәйкес кезеңмен салыстырғанда Жылыой (8,8%-ға), Мақат (4,8%-ға) аудандарында байқалды.
