Атырауда "Ақжайық" резерватында қамыс өртеніп жатқанын бұған дейін жазған болатынбыз. Оған жергілікті өрт сөндіру күштерінен бөлек, Шымкент қаласынан "Қазавиақұтқару" АҚ-ның тікұшақтары да жұмылдырылды.
Қазіргі күні ҚР ІІМ Төтенше жағдайлар комитетінің авиациясы Атырау облысындағы жану ошақтарына 30 тонна су шашқан. Оның ішінде, "МИ-17" тікұшағы жану ошағына әр жолы он тоннадан су шашып отырса, "Еврокоптер145" тікұшағы жану аумағын бойлай ұшып өрт сөндіріп отыр. "
Жану орны батпақты, өсімдіктердің биік болуы өртті сөндіруді қиындатып отыр, арнайы техниканың өту мүмкіндігі жоқ болғандықтан әуе арқылы әрекет етіп отырмыз", - деп түсіндіреді облыстық төтенше жағдай департаментінің баспасөз қызметінен.
Бұдан бөлек, 6 қыркүйек күні қалалық полигонда да өрт болып, ол топырақ төгу арқылы сөндірілді. Шамамен таңғы сағат 06.00-де тұтанған тілсіз жау 100 шаршы метрдей жерді қамтыған. Ол "Арнайыавтобаза" ЖШС жұмысшылары мен техникасының күшімен ауыздықталды.
"Өрттің себебі - табиғи өздігінен жану. Қазіргі уақытта өрттің салдары толығымен жойылды. Қалалық қоқыс алаңында өрттің алдын-алу бойынша профилактикалық жұмыстар жүргізілуде. Коммуналдық техникалардың бір бөлігі теңіздегі қамыс өртін жою жұмыстарына жіберілді", - деп хабарлайды аталған департаменттен.
Құралай Қуатова
