Батыс Қазақстан облысында биыл өрттің қауіпті кезеңінде үш орман өрті болып, 119 табиғи жану салдарынан 1946 га жер тілсіз жауға оранған. Жыл басынан бері 195 өрт дерегі тіркелген, оның 134-і жеке тұрғын үй секторында, алпыс шақтысы - монша, шаруашылық құрылыстары мен гараждарда болған, 27 рет шөп өртеніпті. Өкініштісі, олардан жеті адам жарақат алып, үш адам көз жұмған. Өрттен келген шығын – 3 млн теңгеге жуық.
Жаз маусымында өрттің көбейіп кетуінің себептері – құрғақ шөптер мен қоқыс-қалдықтарды өртеуден болып отыр. Тұрғындар ауласын, үйінің жан-жағын тазалағанда жиналған қоқысты өртеймін деп қауіпсіздік талаптарын естен шығарып жатады. Жақында ғана, 6 маусым күні 1975 жылғы азамат осылай аяқ асты шығып кеткен өрттен үшінші дәрежелі күйік алып, қазіргі күні қалалық ауруханада емделуде.
Тілсіз жауға жол беретін тағы бір фактор – жаз мезгілінде табиғат аясында серуендеудің көбеюі. Табиғат аясына шыққан көпшіліктің темекі шегіп, от жағып, ас пісіріп, көңіл көтергенінен кейін бірнеше өрт оқиғасы тіркеліп жататыны жасырын емес.
Әсіресе, облыстық төтенше жағдай департаментінен білгендей, карантиндік шектеулер жеңілдетіле бастағаннан кейін халық қала аумағынан тыс жерлерге жаппай шыға бастаған.
"Өткен жылғы шөпті өртеу табиғат үшін пайдалы және өртенген жерге кейін шөп жақсы өседі деген қате пікір бар. Шындығында, табиғат үшін оттан өзге аса зиянды ештеңе жоқ. Өртегеннен соң біраз уақыттан кейін өртенген жерді шөп жарып шығатыны рас, бірақ ол жерлерде бұрынғы сан түрлі шөптер өспейді. Ал тамыры тереңге жайылған көпжылдық арамшөптер өртті оңай еңсеріп, бос қалған үлкен аумақтарға жайылып өседі", – дейді Батыс Қазақстан облысы төтенше жағдай департаменті бастығының орынбасары азаматтық қорғау майоры Нұрлан Таубеков.
Құралай Қуатова
