Қазіргі таңда тиісті органдар балалардың денсаулық жағдайын, оларды құжаттандыру және барлық құқықтарын қалпына келтіру мәселелерімен айналысуда, деп хабарлайды inbusiness.kz сайты.
Бұған дейін әлеуметтік желіде Жетісай базарында арба сүйреп жүрген 7 жасар баланың видеосы тараған болатын.
Анасының жоқтығын айтқан жеткіншек 5 жастағы інісі және әкесі үшеуі бірге тұратындығын айтады. Ол құжаттарының жоқтығынан мектепке бармаған.
Аталған жағдайға байланысты ҚР Оқу-ағарту министрлігі Балалардың құқықтарын қорғау комитеті мәлімдеме жасады. Ведомствоның хабарлауынша, мәселені шешу үшін мемлекеттік орган бекіткен алгоритмге сәйкес арнайы топ жұмылдырылған.
"7 жасар бала мен оның інісі қауіпсіз жерде. Қазіргі уақытта тиісті органдар балалардың денсаулық жағдайы, оларды құжаттандыру және барлық құқықтарды қалпына келтіру мәселелерімен айналысуда. Айта кетейік, әр баланың құқықтары мен мүдделерін, оның ішінде отбасын, қауіпсіздікті, білім беруді және лайықты өмір сүру жағдайларын қорғау басымдық болып табылады. Аталған мәселе түпкілікті шешілгенге дейін Балалардың құқықтарын қорғау комитетінің бақылауында болмақ", — делінген комитет тарапынан берілген ақпаратта.
