Премьер-министр Олжас Бектенов аса ауқатты азаматтарға салық салу тәсілдерін енгізу бойынша құзырлы министрліктерге тапсырма берді, деп хабарлайды inbusiness.kz сайты.
Оның сөзінше, Ұлттық экономика министрлігі жаңа Салық кодексіне енгізілетін нақты түзетулер легін пысықтасын және мемлекеттік органдармен жедел келісуді қамтамасыз ету қажет.
"Бөлек мәселе – бай-бағландарға арналған салық мөлшерлемесі. Ұлттық экономика және Қаржы министрліктері бір ай мерзімде халықаралық тәжірибені зерделеп, аса ауқатты азаматтарға салық салу тәсілдерін енгізсін. Қаржы министрлігі жергілікті жерлерде салықтардың жиналуын ұлғайту жөнінде шаралар қабылдасын, сондай-ақ көлеңкелі экономика деңгейін төмендетуді қамтамасыз етіп, салық және кедендік әкімшілендіруді, оның ішінде жасанды интеллект құралдарын қолдана отырып, толық цифрландыруды аяқтасын", – деді Үкімет басшысы.
Айта кету керек, бұған дейін ірі дәулет иелеріне жоғары салық салынуы мүмкін екенін жазғанбыз.
