Сербия астанасы Белград қаласындағы тәртіпсіздіктер кезінде 17 ереуілші мен 19 полицей зардап шекті. Бұл дүмпудің басталуына биліктің коронавирус жұқтырғандар санының өсуіне байланысты санитарлық шараларды күшейту туралы шешімі себеп болған.
Ресми дерекке сүйенсек, бір полицейді көлік қағып өткен. Жарақат алғандардың барлығы да ауруханаға жеткізілген.
Шаһардағы бас көтерулердің басталғанына екі күн болды. Бұған дейін хабарланғандай, сейсенбіде 43 полицей мен 17 тұрғынның жарақат алған еді. Сонымен қатар тәртіпсіздікті ұйымдастырған 23 адам қамауға алынды. Жергілікті полиция басшысы Владимир Ребичтің сөзінше, тәртіп сақшылары ереуілді басуға дайын болмаған. Қазір наразылық шарасына қатысқандардың аты-жөні анықталып жатыр. Жуырда олар жауапқа тартылатын болады.
Соңғы мәлімет бойынша, Сербияда коронавирус жұқтырғандардың саны 16 мыңнан асып, 300-дей адам қаза тапқан.
Табиғат Нұрболат
Фото: gazeta.ru
