Ақмола облысында тас жолда болған жол-көлік оқиғасы салдарынан көпбалалы жүкті әйел және оның жұбайы көз жұмды, деп хабарлайды inbusiness.kz сайты.
Ақмола облысы полиция департаментінің баспасөз қызметі таратқан мәліметке сәйкес, "Ақсу – Бестөбе – Изобильное" автожолында "LADA Largus" және "Toyota Land Cruiser Prado" көліктерінің қатысуымен жол апаты орын алған.
"Жол-көлік оқиғасы салдарынан "LADA Largus" көлігінің жүргізушісі мен жолаушысы оқиға орнында қайтыс болды. Қазіргі уақытта сотқа дейінгі тергеу жүргізіліп жатыр, оның қорытындысы бойынша процессуалдық шешім қабылданады", – деп түсіндірді ведомство өкілдері.
Полиция қызметкерлері мұндай қайғылы жағдайлардың алдын алу үшін жол қозғалысына қатысушыларға жылдамдық режимін қатаң сақтаудың, әсіресе көлік қозғалысы қарқынды учаскелерде аса мұқият болудың, сондай-ақ көліктің техникалық жағдайын үнемі бақылауда ұстаудың маңызын еске салды.
Белгілі болғандай, жол апатынан төрт баланың анасы, бесінші сәбиін күтіп жүрген әйел және оның жұбайы қаза тапқан.
