Елордада бұрынғы Денсаулық сақтау министрі Елжан Біртанов пен бұрынғы вице-министр Олжас Әбішев ісі бойынша апелляциялық сот шешімі шықты, деп жазады inbusiness.kz.
Апелляциялық алқа экс-шенеуніктердің шағымын қанағаттандырмады.
"Сот алқасы қаулы етті: Астана қаласы Сарыарқа ауданының № 2 аудандық сотының өткен жылғы 28 қазандағы Елжан Біртанов пен Олжас Әбішевке қатысты үкімі өзгеріссіз қалдырылсын. Сотталғандардың қорғаушыларының апелляциялық шағымдары қанағаттандырусыз қалдырылсын. Қаулы жарияланған сәттен бастап заңды күшіне енеді", - делінген сот шешімінде.
Еске салайық, бұрынғы Денсаулық сақтау министрі мен экс-вице-министрге қатысты сот үкімі 2022 жылдың 28 қазанында шыққан болатын. Оған сәйкес Елжан Біртанов 5 жылға, ал Олжас Әбішев 4 жылға бас бостандығын шектеу жазасына кесілді. Одан кейін экс-шенеуніктердің адвокаттары №2 Сарыарқа сотының үкіміне апелляциялық шағым түсірген болатын.
