2021 жылы Нұр-Сұлтанда 10 мың әлеуметтік пәтер салынады. Бұл туралы қала әкімі Алтай Көлгінов айтты, деп хабарлайды inbusiness.kz тілшісі.
Оның айтуынша, 2020 жылы елордада 3 миллион шаршы метрден аса тұрғын үй салынған. Олардың 80%-ы – жеке инвестиция.
"Мемлекет басшысының тапсырмасы бойынша қолжетімді баспана санын 3 есе арттырдық. Мысалы, 2018 жылы 1100 әлеуметтік пәтер салынса, 2019 жылы жеңілдікпен берілетін 2900 пәтер, ал 2020 жылы 7 мыңнан аса әлеуметтік пәтер салынды. Биыл жеңілдікпен берілетін пәтер саны 10 мыңға дейін артады", - деді Алтай Көлгінов халыққа есеп беру кездесуінде.
Сонымен қатар, елорда әкімі биыл "Жұмыс істейтін жастарға арналған жалдамалы баспана" бағдарламасы жалғасатынын атап өтті.
"Бағдарлама аясында жыл соңына дейін 1 мыңнан аса жас баспаналы болады", - деді ол.
Айта кетейік, осыған дейін Алтай Көлгінов тұрғын үй сертификатының сомасы 1 миллион теңгеден 1,5 миллион теңгеге дейін өсетінін айтқан еді.
Дәурен Ерболат
