26 мамырда "Қазхром Трансұлттық компаниясы" АҚ филиалы - Дон тау-кен байыту комбинатының "Болашақ" шахтасында болған оқиғаға байланысты төтенше жағдайлар вице-министрі Серік Төленбергенов пен ТЖМ Өнеркәсіптік қауіпсіздік комитеті төрағасының орынбасары Кеңгірбай Есенеев Ақтөбе облысына келді, деп жазады inbusiness.kz сайты.
Вице-министр кәсіпорын басшылығы мен мемлекеттік органдар өкілдерінің қатысуымен кеңес өткізді. Кеңес қорытындысы бойынша вице-министр Өнеркәсіптік қауіпсіздік комитеті төрағасы орынбасарының төрағалығымен апатты тергеу жөніндегі комиссия құруды тапсырды.
"Комиссия апаттың мән-жайы мен себептерін анықтайтын болады. Сутегі шығарындыларының қайталануына байланысты және жұмысшылардың қауіпсіздігін қамтамасыз ету мақсатында шахтадағы барлық жұмыстарды уақытша тоқтата тұру туралы шешім қабылданды", - делінген ТЖМ таратқан хабарламада.
Вице-министр ауруханада жатқан зардап шеккендер адамдарға барып, тез сауығып кетулеріне тілектестік білдірді.
Айта кетейік, 26 мамыр күні сағат 22:30 шамасында "Дон ТБК-ның "Болашақ" шахтасының өндіру блогында ауа ортасының қысқа мерзімді жануы орын алды. Жабдықты монтаждау жұмыстарын жүргізіп жатқан 3 кезекші электрслесарь зардап шекті. Қызметкерлер беті мен қолының білезік тұсынан күйік шалып, ауруханаға түсті.
