Айыпталушы соңғы сөзінде бәрінен кешірім сұрап, туған ауылы туралы тебіреніп айтты, деп хабарлайды inbusiness.kz сайты.
– Мен өзіме тағылған айыпты қолдамаймын, менің қолымда қару-жарақ болған жоқ, ешқандай төбелесуге ниетім болған жоқ. Оның бәрі бейнематериалдарда көрініп тұр. Тұрар Рысқұлов – атамыз еліне елеулі, халқына қалаулы адам, баяғыда қазағымызды ашаршылық заманнан құтқарып қалған атамыздың туған жерінде тұрамыз. Балағат сөздер ауылымызға тимесе екен дейміз, – деді Нұрбол Тоқтаубаев.
Сондай-ақ, айыпталушылардың бәрі ешқандай тіреуі жоқ қарапайым қазақ балалары екенін атап өтті.
– Біз ешқандай да бандит емеспіз, рэкет емеспіз. Қазақтың қарапайым қарадомалақ баласымыз. Тұрар Рысқұлов ауылында туып-өскен қарапайым баламыз. Ешқандай да депутаттың, әкімнің балалары емеспіз. Бізді балағаттап, үстімізден жалған айып тағып, жалған ақпарат таратып жүрген блогерсымақтарға айтарым, мәселенің анық-қанығына көз жеткізіп барып сөйлеген дұрыс деп ойлаймын. Сабақ болсын! – деді сотталушы.
Бұған дейінгі жарыссөзде Нұрбол Тоқтаубаев өзін ақтауға тырыспайтынын айтқан еді.
