Президент Қасым-Жомарт Тоқаевтың тапсырмасы бойынша ауыл шаруашылығы тауарын өндірушілерге дизель отынының литрі 165 теңгеден сатылады. Ауыл шаруашылығы бірінші вице-министрі Айдарбек Сапаровтың сөзінше, бұл нарықтағы бағадан 13-15%-ға арзан.
"Арзандатылған дизель отынын әділ бөлу бойынша жұмыс жүргізіліп жатыр.
Министрлік пен әкімдік мәселені бақылауда ұстап отыр", – деді Айдарбек Сапаров.
Вице-министрдің мәлімдеуінше, "Қарапайым заттар экономикасы" бағдарламасы бойынша көктемгі егіс жұмыстарына қосымша 100 млрд теңге бөлінді.
"Субсидиялауды есепке ала отырып, соңғы сыйақы мөлшерлемесі қарыз алушылар үшін жылдық 6% құрайды. Бұл шаруаларды айналым қаражатымен, тұқыммен, тыңайтқышпен, қосалқы бөлшектермен қамтамасыз етуге мүмкіндік береді", – деді Айдарбек Сапаров.
Бұдан кейін ол еліміздің оңтүстік өңірлерінде көктемгі дала жұмыстары жүріп жатқанын жариялады.
"Жамбыл облысында – 249,5 мың, Түркістан облысында – 167,5 мың,
Алматы облысында – 97,1 мың, Қызылорда облысында – 23,9 мың гектар алқапқа тұқым себілді", – деді вице-министр.
Қанат Махамбет
