Тергеу барысында биылғы жылдың 5 маусымында "Эйр Астана" компаниялар тобына кіретін Fly Arystan әуетасымалдаушысының Алматы – Шымкент бағыты бойынша КС-7105 рейсі 15 сағат 10 минутқа кешіккені анықталды, деп хабарлады Азаматтық авиация комитетінің баспасөз қызметі.
"Осы рейстің жолаушыларына ұшуды күту кезінде "Қазақстан Республикасының әуе кеңістігін пайдалану және авиация қызметі туралы" Қазақстан Республикасы Заңының 86-бабының 1-бөлігінде көзделген қызметтер, атап айтқанда, қонақ үйде орналастыру қызметтері дұрыс деңгейде көрсетілмеген. Осыған байланысты ағымдағы жылдың 28 шілдесінде, авиакомпанияға қатысты Қазақстан Республикасының Әкімшілік құқық бұзушылық туралы кодексінің 567-бабының 2-бөлігімен әкімшілік құқық бұзушылық туралы хаттама жасалып, оған сәйкес авиакомпанияға 1000 АЕК (3 000 063 теңге) көлемінде айыппұл салынды",- деп жазылған хабарламада.
Бұған дейін "Эйр Астана" компаниялар тобы биылғы жылдың 7 және 21 шілдесінде рейсті кешіктіру кезінде жолаушылардың құқықтарын бұзғаны үшін 1000 АЕК (3 000 063 теңге) көлемінде айыппұл түрінде әкімшілік жауапкершілікке тартылған болатын.
Аталған компаниялар тобына жалпы биыл 9 189 000 теңге көлемінде айыппұл кесілген.
"Қазіргі уақытта рейстің кешігуіне және жолаушылар құқықтарының бұзылуына байланысты тергеу жалғасуда, құқық бұзушылық фактілері анықталған жағдайда тасымалдаушылар Қазақстан Республикасының қолданыстағы заңнамасына сәйкес жауапкершілікке тартылады",- деп жазылған хабарламада.
