Астанада жыл басынан бері екі жасөспірімнен АИТВ инфекциясы анықталды. Бұл туралы Астана қаласының бас мемлекеттік санитариялық дәрігері Сарқыт Бейсенова айтты, деп жазады inbusiness.kz.
"Алты айдың қорытындысы бойынша қалада АИТВ-инфекциясының 206 жағдайы тіркелді. Оның ішінде жасөспірімдер арасында 2 жағдай", - деді ол өңірлік коммуникациялар қызметінде өткен брифингте.
Қалалық ЖИТС орталығының мәліметінше, АИТВ-инфекциясы 16 және 17 жасар екі жасөспірімнен анықталған.
"Екеуі де диспансерлік есепке алынды, оларға антиретровирустық терапия тағайындалды. Олармен байланыста болған адамдар АИТВ-ға тексерілді. Жарты жылда анықталған 206 жағдайдың 65,5%-ы 20-39 жастағы адамдардың үлесіне тиеді. 14 жасқа дейінгі балалар арасында АИТВ жағдайлары тіркелген жоқ", - деп хабарлады орталықтың баспасөз қызметі.
Астана бойынша 2044 пациент АИТВ инфекциясы бойынша диспансерлік есепте тұр.
Айта кету керек, осыған дейін Астанада алты айда қызылшаның 117 жағдайы анықталғанын жазған болатынбыз.
