Бұл сұраққа Бас банк төрағасы Ғалымжан Пірматов жауап берді.
"Бұл шешім осы жылдың мамыр-маусым айларында жүргізілген болжамдық раундтың қорытындысы негізінде қабылданды. Біз инфляция өсіп, жыл соңына қарай 13-15 пайыз деңгейінде қалыптасады деп болжап отырмыз", – деді ҰБ басшысы Egemen Qazaqstan-ға сұхбатында.
Ғалымжан Пірматов инфляцияның үдегеніне басқа емес, дәл осы геосаяси жағдайдың шиеленіскені әсер еткенін еске салып өтті. Салдарынан Қазақстанның қаржы нарығына қысым да айтарлықтай күшейген.
"Ресей Федерациясына қарсы санкцияларға байланысты жаһандық жеткізілім тізбегіндегі проблемалардың күрделенуі әлемдегі өндіріс құнының қымбаттауына алып келіп отыр. Шешім қабылдағанда біз осы факторлардың барлығын ескереміз.
Орта мерзімді кезеңде инфляцияны бәсеңдету мақсатымен инфляциямен күрес және экономиканың өсуі арасындағы теңгерімді ескере отырып, біз базалық мөлшерлемені 14 пайыз деңгейінде сақтап қалдық.
Базалық мөлшерлеменің жоғары болуы контрциклдік бюджет саясатымен және сыртқы инфляциялық қысымның әлсіреуімен бірге 2023 жылы инфляцияның 7,5-9,5 пайызға дейін баяулауына ықпал етеді", – деді Ұлттық банк төрағасы.
