Халықаралық валюта қоры ескі банкноттарды жаңасымен алмастыруды ойға алған Сомалидің орталық банкінің жоспарын қолдап отыр, деп мәлімдеді ХВҚ-ның осы елмен байланысына жауапты Самба Тиам.
"Айналымда жүрген банкноттардың 98%-ға жуығы жалған ақша. Ал 1990-1991 жылдары басылып шыққан қалған 2%-ының тозығы жетті", – деп мәлімдеді ол көрші жатқан Кенияның астанасы Найробиде өткен жиында.
Елдің ресми валютасы – сомали шиллингінің бағамы ресейдің шамамен 10 тиынын құрайды. Сондай-ақ елде америка доллары да кеңінен қолданылады.
Жаңа купюралар шығару орталық банктің ақша-несие саясатын жүзеге асыру мүмкіндігін қайта қалпына келтіріп, 5,3 млрд доллар сыртқы қарызды есептен шығару туралы келіссөздерді бастауда маңызды фактор болмақ.
Bloomberg агенттігінің жазуынша, 1991 жылы диктатор Мохаммед Сиад биліктен кеткен соң елде анархия орнады. Дүниежүзілік банк Сомалиді әлемдегі ең кедей бес елдің қатарына жатқызады (мұнда жан басына шаққандағы жылдық табыс 435 долларды құрайды), ал Transparency International Сомалиді әлемдегі жемқорлық әбден жайлаған ел деп таныған.
