Бұл туралы Бала құқықтары жөніндегі уәкіл Динара Зәкиева мәлім етті, деп хабарлайды inbusiness.kz сайты.
– Президент Әкімшілігімен және Оқу-ағарту министрлігі Балалардың құқықтарын қорғау комитетімен бірлесіп атқарған үлкен жетістік – ол қамқоршылық органдары қызметкерлерінің санын әр 5 мың балаға бір адамнан бекіту болды. Мәселен, қазір Астанада қамқоршылық органдарының 8 қызметкері жарты миллион балаға қарап отыр. Әрине, осы қызметкерлер профилактикалық іс-шаралармен барлығын қамтып үлгермейді, сондай-ақ дер кезінде әрекет етуге уақыттары жоқ, – деді Динара Зәкиева.
Оның айтуынша, бұл тұрғыда тиісті түзетуді Мәжіліс қабылдап, Сенаттың қарауына жолдады.
– Осы түзету мақұлданғаннан кейін, Астанада 8 емес, 100 қызметкер болады. Ал, Түркістан облысында 17 емес, 180 маман жұмылдырылады. Әр ауданда 12 қызметкерден болады. Бұл өз кезегінде балалардың құқықтарын қорғаудың бүкіл жүйесін түбегейлі өзгертеді, – деді Бала құқықтары жөніндегі уәкіл.
