Қаржы нарығын реттеу және дамыту агенттігі төрағасының орынбасары Олжас Қизатов Орталық коммуникациялар қызметінде өткен брифингте Bereke Bank-ке қатысты сұраққа жауап берді, деп хабарлайды inbusiness.kz сайты.
Тілшілер Bereke Bank-ті сатып алу мәмілесі қашан аяқталатынын сұрады.
"Акционер катарлық инвестор Lesha Bank-тің Bereke Bank-ті сатып алатынын айтты. Процедуралық тұрғыдан жақын арада – осы айдың соңына дейін немесе келесі айдың басында қатарлық инвесторлар тарапынан банк холдингі мәртебесін алуға арналған құжаттар пакеті ұсынылады деп отырмыз. Біз осы құжатты алғаннан кейін Lesha Bank-ке банк холдингі мәртебесін беру мәселесін қарастырамыз. Бұл мәселе шамамен осы жылдың шілде айының соңында аяқталады деп күтіледі", - деді Олжас Қизатов.
Айта кету керек, осыған дейін қатарлық инвестор Bereke Bank-ті сатып алғанын жазған болатынбыз. "Бәйтерек" ұлттық басқарушы холдингі" АҚ басқарма төрағасының бірінші орынбасары Нұрболат Айдапкелов Сенат кулуарында мәміленің шарттарын ашып айтпады.
