"Қазақалтын" тау-кен металлургия комбинаты" АҚ шотынан 1,5 млрд теңге ұрлаған күдіктілер ұсталды, деп ҚазАқпарат-қа сілтеме жасап inbusiness.kz хабарлайды.
Ақмола облыстық Полиция департаменті баспасөз қызметінің мәліметінше, биылғы 23 ақпанда "Қазақалтын" ТКМК" АҚ өкілдері компанияның шотынан 1 млрд 533 млн теңге ұрлау фактісі бойынша полицияға жүгінді.
Аталған қылмысты ашу үшін криминалдық полиция және тергеу бөлімшелерінің тәжірибелі қызметкерлерінен арнайы жедел-тергеу тобы құрылды. ҚР ҚК-нің 189-бабының 4-бөлігі "аса ірі мөлшерде сеніп тапсырылған бөтен мүлікті иемдену немесе ысырап ету" бойынша сотқа дейінгі тергеу басталды. Оның санкциясы 7 жылдан 12 жылға дейін бас бостандығынан айыруды көздейді.
"Жедел-іздестіру шаралары барысында ағымдағы жылғы 26 ақпанда полиция қызметкерлері Нұр-Сұлтан қаласында екі күдіктіні ұстады. Оның бірі 37 жастағы қаржы бөлімінің қызметкері болса, екіншісі оның 38 жастағы азаматтық некедегі күйеуі. Күдіктілерге қатысты сот "күзетпен ұстау" түріндегі бұлтартпау шарасын санкциялады", – деді ведомстводан.
"Тергеу мүддесіне орай басқа ақпарат жарияланбайды", - деп толықтырды ведомстводан.
Айта кетейік, жақында "Қазақалтын" кенішінен 122 миллион теңгенің алтыны ұрланған болатын.
