Inbusiness.kz тілшісі Қазақстан халқының бірлігі күні республикамызда өтетін іс-шараларға шолу жасады.
Мереке күні ел бойынша көптеген концерттік бағдарламалар, фестивальдер мен түрлі іс-шаралар өтеді. Солардың бірқатарына тоқталып өтуді жөн көрдік.
Астанада сағат 12:00-15:00-де "Бәйтерек" монументі жанындағы алаңда концерт өтеді. Сағат 16.00-де Есіл өзені жағалауындағы амфитеатрда Қазақстан халқының бірлігі күніне арналған мерекелік концерт өтеді. Сағат 18:00-де "Astana Ballet" театрында "Жеті қазына" балетінің премьерасын тамашалауға болады. Саяси қуғын-сүргін және тоталитаризм құрбандарының "АЛЖИР" мемориалды-мұражай кешенінде "Ұлт бірлігі – ұлы байлық" көрмесі таныстырылады. Бұл күні елордада субұрқақтар да іске қосылады.
Алматыда сағат 10.00-де Абай алаңында мерекелік концерт, бұдан басқа Қазақстан халықтарының тағамдары фестивалі де өтеді. "Республика" алаңында "Қазақстан халқының бірлігі мерекесі" концерті өтеді. Шаһардың басқа да аудандарында мерекелік шараларды тамашалауға болады. Осыған дейін мегаполисте 1 мамыр қалай мерекеленетінін жазған болатынбыз.
Шымкентте "Астана" алаңында "Бірлігіміз жарасқан" атты іс-шара қалың жұртшылық назарына ұсынылады.
Қарағандыда Кеншілер мәдениет сарайында "Бейбітшілік – ел тілегі" концерті өтеді.
Таразда "Достық" үйі жанында "Бір шаңырақ астында" мерекелік концерттік бағдарламасын тамашалауға болады.
Түркістанда "Ұлттар достастығы", "Қазақстан – бірлік пен татулық мекені көрме", "Өркениетке негізделген ынтымақтастық", "Ұлт тірегі – ынтымақ", "Менің Отаным – Қазақстан", "Бейбітшілік ел тілегі" атты танымдық кештер, кітап көрмесі, достық сағаты, мерекелік концерттер өтеді. 1-2 мамыр күндері Түркістан музыкалық драма театрында "Беу, қыздар-ай" атты музыкалық комедияның премьерасы көрерменге жол тартады.
Өскеменде "Ертіс концерт" үлкен залында Атырау қаласының қазақ халық аспаптар оркестрінің концерті өтеді. Сол жағалау саябағында Қазақстан халқының бірлігі күніне орай іс-шаралар кешені қарастырылған.
Ақтауда Достық үйі алаңында "Қазақстан – достық үйі" мерекелік концертін тамашалауға болады. Облыстық кітапханада "Ұлт бірлігі – ұлы байлық" кітап көрмесі ұйымдастырылады. Амфитеатр алаңында Қазақстан халықтарының бірлігі күніне арналған мерекелік "Татулық – тәуелсіздік кепілі" шығармашылық ұжымдардың гала концерті өтеді.
Талдықорғанда "Жастар" саябағында 1 мамырға орай Қазақстан халқы Ассамблеясы мүшелерінің қатысуымен "Бір шаңырақ астында" фестивалі, бұдан бөлек жастарға арналған "DJ FEST" кешкі концерттік бағдарламасы өтеді.
Ақтөбеде "Ұлт бірлігі – ұлы байлық" облыстық халықтар достығы фестивалі, "Қазақ халқына мың алғыс" стелла алаңында "Халықтың қуаты – бірлікте!" атты қалалық мәдени-көпшілік шара, Қазақстан Халқы Ассамблеясының "Бірлігі жарасқан – Қазақстан" облыстық достық фестивалінің гала концерті өтеді.
Петропавлда Орталық алаңда "Бейбітшілік – ел тілі" концерттік бағдарламасын, "Бір үйдің баласындай" гала-концертін, "Бірлігіміз жарасқан!" фестивалін тамашалауға болады.
Қостанайда "Карнавал" би ансамблінің концерті өтеді. Мереке күні "Керуен" саябағы жағалау аумағында Қазақстан халқының бірлігі күніне арналған іс-шаралар өтеді.
Қонаевта Орталық алаңда Қазақстан халықтарының бірлігі күніне арналған концерттік бағдарлама өтеді.
Атырауда Сұлтан Бейбарыс алаңында мерекелік концерт өтеді. "Ретро" паркінде "Қазақстан – достық мекені" мәдени-бұқаралық іс-шаралар қарастырылған.
Оралда Абай алаңында мерекелік концерттік бағдарлама көпшіліктің назарына ұсынылады.
Қызылордада "Сыр ана" монументінде "Татулығы жарасқан – берекелі Қазақстан" атты мәдени көпшілік шара өтеді.
Семейде Невзоровтар отбасы атындағы облыстық бейнелеу өнері музейі, облыстық тарихи-өлкетану музейі, Ф.М.Достоевскийдің әдеби-мемориалдық музейінде "Ашық есік" акциясы, "Тәуелсіздік" алаңында "Бірлік бар жерде – тірлік бар" мерекелік концерті өтеді. Сондай-ақ қала тұрғындары "Қазақстан – достық шаңырағы" облыстық жастар этнофестивалін де тамашалай алады.
Павлодарда "Шаңырақ" концерттік залында "Жас қанат" эстрадалық студиясының мерекелік концерті көрермендер назарына ұсынылады. Орталық мәдениет және демалыс саябағында "Ынтымағы жарасқан туған өлкем" мерекелік бағдарламасы, Орталық алаңда көпшілік думан өтеді.
Материал ҚР Мәдениет және спорт министрлігі, ҚР Ақпарат және қоғамдық даму министрлігінің ақпаратына сүйене отырып жазылды.
