Елімізде ұзақ жылдан үздіксіз жұмыс істеп келе жатқан кәсіпорын аз, олардың жартысына жуығы құрылғанына бес жыл ғана болған, деп жазады finprom.kz.
Қазіргі таңда жұмыс істейтін кәсіпорынның саны – 330,3 мың, яғни жылдық өсім 7,2%-ға жеткен. Соның ішінде белсенді еңбектеніп келе жатқаны – 167,8 мың болса, кәсіпорындардың 36,3%-ы уақытша қызметін тоқтатқан. Ал жаңадан ашылған кәсіпорындардың үлесі – 12,8%, бұл былтырғымен салыстырғанда 3,2%-ға кем.
Қазақстанда 1-5 жылдан бері жұмыс істеп келе жатқан – 130 мың, 6-10 жылдық тарихы бар 65,8 мың компания бар. Сондай-ақ, 11 жылдан 15 жылға дейін үздіксіз еңбектеніп келе жатқан кәсіпорынның саны 45,9 мыңды құрайды. Ал ел нарығында 25 жылдан астам уақыт бойы жұмысын жалғастырып келе жатқан кәсіпорын небары – 4,2 мың.
Компанияларың көбі көтерме және бөлшек саудада және құрылыс пен білім саласында жұмыс істейді. Тарқата айтсақ, 20 жылдық тарихы бар кәсіпорындардың көбі – сауда және құрылыс саласында. Ал 25 жылдық тарихы бар кәсіпорындардың басым көпшілігі білім, жылжымайтын мүлік, мемлекеттік басқару және қорғаныс салаларында кәсібін жүргізеді.
