Бүгін Мәжілісте күзет қызметін жетілдіруге арналған заң жобасы бірінші оқылымда талқыланды, деп жазады inbusiness.kz сайты.
Аталған құжатты таныстырған депутат Жарқынбек Амантайұлы Қазақстандағы күзет ұйымдарының қорындағы қару-жарақтың айналымы қалай қадағаланатынын айтты.
– Қолымыздағы мәлімет бойынша, елімізде 4300-дей күзет ұйымы тіркелген. Оның 1600-ге жуығының қару сатып алуға, қолдануға лицензиясы бар. Олардың қолында 22 мыңнан астам қару бар деп есептеледі. Қазіргі уақытта 1186 күзет ұйымы жұмысын тоқтатып тұрса, олардың қолында 930-дай қару бар. Осы 1186 ұйымның 140-қа жуығында ғана қару сатып алуға, қолдануға рұқсат берілген, – деді ол.
Оның айтуынша, қолданыстағы заң ол ұйымдарды қолдағы қаруын қайтаруға міндеттемейді.
– Мына заң қабылданса, оларды бақылауға алу, қаруын Ішкі істер министрлігінің өкілдіктеріне өткізу жолға қойылады, – деп сөзін толықтырды депутат.
Бұған дейін күзетшілердің өткен жылы қанша қылмыс жасағаны туралы жазған едік.
