North Caspian Operating Company акционерлері Каспий теңізінің қазақстандық секторындағы "Қаламқас-Теңіз" кен орнын игеру жұмыстарын бастамайтын болды. Бұл туралы "PSA" ЖШС-нің өкілетті органы хабарлады.
Айта кету керек, NCOC консорциумы акционерлерінің қатарында "Қазмұнайгаз" (акциялардың 16,88%), Shell, ExxonMobil, Total мен италиялық Eni (әрқайсысында 16,81%-дан), қытайлық CNPC (8,33%) және Inpex (7,56%) бар.
Кен орнын игеруден бас тартуға капиталды шығын көлемінің жоғарылығы жағдайында жоба табыстылығының төмендігі себеп болған.
Ал бұған дейін, қыркүйек айында NCOC пен КМОК 2019 жылдың төртінші тоқсанында "Қаламқас-Теңіз" және "Хазар" кен орындарын игеру жоспарын жариялайды деп хабарланған еді.
Энергетика министрлігінің айтуынша, 2018 жылдың желтоқсан айында Қазақстан мен Солтүстік-Каспий жобасының инвесторлары келісімге келген еді. Құжатқа сәйкес, егер де кен орнын игеру туралы жоспар 2019 жылдың соңына дейін ұсынылмаса, "Қаламқас-Теңіз" ерікті түрде республикаға қайтарылуы керек.
Табиғат Нұрболат
