Энергетика министрлігі сұйытылған газ тұтынушыларымен келіссөздер жүргізді. Бұл туралы ведомство басшысы Алмасадам Сатқалиев мәлімдеді, деп хабарлайды inbusiness.kz сайты.
"ҚазРосГаз"-дың біздің газ конденсатын Ресей Федерациясында қайта өңдеу арқылы республикамыздың ішкі нарығына немесе сыртқы нарыққа 90 мың тонна сұйытылған газды жеткізуге мүмкіндігі бар. Біз сұйытылған мұнай газының тапшылығына байланысты "ҚазРосГаз"-дан Қазақстанның сатып алушыларына осы жеткізілімді жүзеге асыруды сұрадық. Яғни біз қазір сұйытылған газ тұтынушыларымен келіссөздер ұйымдастырдық. Олардың қатарында ірі өнеркәсіптік кәсіпорындар, бөлшек сауда нарығының қатысушылар бар", - деді ол тілшілердің сауалына берген жауабында.
Сатқалиевтің сөзінше, министрлік сұйытылған газ тұтынушыларын қажетті ресурстармен қамтамасыз еткен.
"Жалпы алғанда ішкі нарыққа газды жеткізу үшін тағы қосымша ресурсымыз бар", - деп жалғастырды ол.
БАҚ өкілдері сұйытылған газ ішкі нарыққа қандай бағада жеткізілетінін нақтылады.
"Олар экспорттық бағалар бойынша жеткізетін болады. Яғни бұл халықаралық баға болады. Біз экономикалық тұрғыдан "ҚазРосГаз"-ға қатысты қандай да бір ішкі бағаны қолданбаймыз", - деді Энергетика министрі Мәжілісте өткен комитет отырысында.
Айта кету керек, осыған дейін елімізде сұйытылған газ бағасы қымбаттайтынын жазған болатынбыз.
