Департамент мамандары бұл мәліметті растап отыр. Жүргізілген мониторингтік тексерулер осындай фактілерді анықтаған.
Осылайша, тұрғын үй қатынастары саласында ЖАО-ның құрылымдық бөлімшелері тарапынан "Тұрғын үй қатынастары туралы" заңнамада көзделген кезекте тұрғандардың тізімдерін өзектендіру бойынша іс-шаралар жүргізбейтіні белгілі болып отыр.
Зерделеу кезінде кезекте тұрғандардың ішінде заңсыз жолмен тіркелгендері – 5 725-тен астам. Тіпті баспана алу үшін кезекке жазылғандардың 257-і "келмес" сапарға кеткендер болып шықты.
Кезектегі былық мұнымен бітпейді. Онда қайтыс болғандармен бірге әртүрлі жылжымайтын мүліктері бар – 3 415, мұқтаж ретінде есепке қойылғаннан кейін некеге тұрған – 1 955, өзі басқа елде тұрып жатқан – 17, Жамбыл облысында тіркелмеген 81 азамат бар болып шықты.
Сыбайлас жемқорлыққа қарсы іс-қимыл агенттігінің Жамбыл облысы бойынша департаменті осы мәселе бойынша Тараз қаласы мен аудандардың әкімдеріне мониторинг нәтижелерін жолдады. Қазір департаменттің араласуы нәтижесінде кезектен 1 075 адам алынды. Қалған 4 650 бойынша қазіргі уақытта оларды кезектен шығару мәселесі қаралып жатыр.
