Осылайша, Бақытжан Базарбек Жамбыл облысында күні кеше ғана болған жол-көлік оқиғасына түсінік берді, деп хабарлайды inbusiness.kz сайты.
– Менің қатысуыммен болған жол-көлік оқиғасына қатысты туындаған көптеген ойдан шығарылған әңгіме мен қауесеттерге жауап бере алмаймын әрі көп нәрсені жаза алмаймын.
Сотқа дейінгі қозғалған тергеп-тексеру аясында мен және жұбайым сотқа дейінгі тергеу мәліметтерін жария етпеу туралы қолхатқа қол қойдық, – деп жазды экс-депутат.
Оның сөзінше, тергеу жұмыстары жалғасуда, қазіргі уақытта қажетті сараптамалардың жүргізілуі күтіліп отыр.
"Тергеу органдары заңға сәйкес болған оқиғаның барлық мән-жайына объективті әрі әділ баға береді деп сенемін" деген Бақытжан Базарбек ең басты жайтты атап өтті.
– Қазір мен үшін ең бастысы – зардап шеккен азаматтың өзіне, жақындары мен туыстарының қасында болып, оларға қажетті көмек көрсету. Біз бірнеше күн бойы іс жүзінде ұйықтамай, оның туған-туыстарымен бірге оның сауығып кетуін тілеп, дұға жасап отырмыз.
Көрсетілген шұғыл медициналық көмек үшін аудандық аурухананың барлық дәрігеріне, сондай-ақ Денсаулық сақтау министрлігі мен облыстық денсаулық сақтау басқармасына ерекше алғысымды білдіремін, – деді ол.
Жазба соңында заңгер әлеуметтік желілерде қазірдің өзінде түрлі нұсқалар мен алып-қашпа әңгімелер тарап жатқанын еске салды. Сол себепті, ол көпшілікті асығыс қорытынды жасамауға және тек ресми ақпарат пен тергеу нәтижелеріне сенуге шақырып отыр.
