Қазақстанның Тәуелсіздік күні қарсаңында Колумбия Республикасында Қазақстанның тұңғыш Құрметті консулдығының ашылу рәсімі өтті, деп хабарлайды СІМ баспасөз қызметі.
Іс-шараға Қазақстанның Бразилиядағы Елшісі Қайрат Саржанов, Колумбия СІМ Еуропа департаментінің директоры Хуан Кастро, қаланың қоғамдық-саяси және іскер топтарының, дипломатиялық корпус пен медиа қоғамдастықтың өкілдері қатысты.
Өз сөзінде Қ. Саржанов Колумбия Үкіметіне Қазақстанның Құрметті консулдығының ашылуына қолдау көрсеткені үшін алғысын білдіріп, Омар Валдеске консулдық патентті онлайн режимде табыс етті. Ол Құрметті консулдықтың ашылуы Нұрс-Сұлтан мен Богота арасындағы екіжақты күн тәртібін, әсіресе сауда, инвестициялық және гуманитарлық бағыттарда, оның ішінде Қазақстан 2019 жылғы шілдеде бақылаушы мәртебесін алған Тынық мұхиты альянсы шеңберінде кеңейту жөніндегі саяси ерік-жігерінің көрсеткіші болып табылатынын атап өтті.
Колумбия СІМ Еуропа департаментінің директоры Хуан Кастро Қазақстанның Құрметті консулдығының ашылуымен құттықтады, бұл 2012 жылы СІМ-аралық саяси консультациялар тетігін орнатудан басталған екіжақты байланыстарды одан әрі дамытуға ықпал ететін болады. Колумбиялық дипломат Богота қаласында 2019 жылғы желтоқсанда өткен Дипломатиялық және қызметтік паспорттардың иелері үшін визасыз режим туралы келісімге қол қою және ұлттық паспорттардың иелері үшін оны өзара қамтамасыз ету жөніндегі уағдаластыққа қол жеткізу арқылы Сыртқы істер министрлерінің орынбасарлары деңгейінде консультациялардың 4-раундының қорытындылары бойынша қол жеткізілген визасыз режимнің маңыздылығын атап өтті. Ол Колумбия Үкіметінің ЭЫДҰ-ға кіру тәжірибесімен бөлісуге дайын екенін атап өтіп, келесі жылы сімаралық консультациялардың 5-раундын өткізуді ұсынды.
Өз кезегінде, Қазақстанның Құрметті консулы Омар Валдес Қазақстан Үкіметіне сенім білдіргені үшін алғыс айтып, екі ел арасындағы, соның ішінде ауыл шаруашылығы, тау-кен және мұнай өнеркәсібіндегі өзара іс-қимылдың әлеуетті бағыттарын белгіледі. Бизнесмен колумбиялық кәсіпкерлерді қазақстандық серіктестермен іскерлік байланыс орнату және бірлескен жобаларды жүзеге асыру үшін Құрметті консулдықтың мүмкіндіктерін пайдалануға шақырды.
Колумбия – 49 миллион халқы бар Оңтүстік Америкадағы мемлекет, 2020 жылдың сәуірінде ЭЫДҰ-ның 37 мүшесі болды. Қазақстан мен Колумбия арасындағы дипломатиялық қарым-қатынастар 1992 жылғы шілдеде орнатылды. 2012 жылғы қазаннан бастап Сыртқы істер министрліктері арасындағы консультациялар тетігі жұмыс атқаруда. 2020 жылғы қаңтар-қазан аралығындағы тауар айналымының көлемі 4,69 млн долларды (экспорт – 1,69 млн доллар және импорт-3 млн доллар) құрады. Қазақстандық экспорттың негізгі баптары – химиялық өнімдер, механикалық құрылғылар, бағалы емес және қара металдардан жасалған бұйымдар. Импорттың негізгі баптары-гүлдер, декоративтік және сирек өсімдіктер, темекі шикізаты, ет.
