Ақмолалық полицейлер жасырын есірткі зертханасын жойды, деп хабарлайды inbusiness.kz порталы Polisia.kz-ға сілтеме жасап.
"Қосшы қаласы полиция бөлімінің Есірткі қылмысына қарсы іс-қимыл басқармасының жедел қызметкерлері Лесная поляна тұрғын үй массивінің аумағында 31 жастағы жергілікті тұрғынды ұстады. Одан темекі шегуге арналған қолдан жасалған құралдар және ішінде өсімдік тектес заты мен ерекше иісі бар 100-ге жуық сіріңке қорабы тәркіленді. Алынған зат марихуана болып шықты", – деп жазылған ақпаратта.
Есірткіні сатып алу арнасын анықтау үшін полицейлер Қосшы қаласында арнайы операция өткізіп, ресейлік 39 жастағы азамат ұсталған.
"Шетелдік жалға алған үйден полиция масаның торларында кептірілген белгілі бір иісі бар сұр-жасыл түсті қарасораға ұқсас өсімдікті тауып, салмағы 19 кг болатын 35 бұтаны тәркіледі. Сонымен қатар, есірткі заттарын өсіруге және өндіруге арналған әр түрлі құрылғылар, соның ішінде күн сәулесін имитациялауға арналған арнайы шамдар, топыраққа арналған тыңайтқыш және температура тетіктері тәркіленді", – делінген ІІМ ақпарат көзінде.
2011 жылдың тамыз айынан бастап аталған тұлға Ресей Федерациясының Қылмыстық кодексінің 111-бабында көзделген қылмыстық әрекеттері үшін Ресей ІІМБ Тюмень облысы бойынша мемлекетаралық іздеуде екені белгілі болған.
Қазіргі уақытта ҚР ҚК-нің 297-бабы 2-бөлігімен (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) сотқа дейінгі тергеу шеңберінде құрамында есірткі бар өсімдіктерді заңсыз өсіру фактісі бойынша қылмыстық іс қозғалды (ҚР ҚК 300-бабы 2-бөлігі). Полиция қызметкерлері қажетті тергеу шараларын жүргізуде.
Айыпталушы қамауға алынды.
