Маңғыстау облысындағы теміржол стансаларының бірінде айырма кезекшісі жұмыс орнында қайтыс болды. Аталған факті бойынша қылмыстық іс қозғалып, оқиғаның мән-жайы анықталып жатыр, деп хабарлайды inbusiness.kz сайты.
Lada.kz мәліметінше, 5 шілде күні таңертең Маңғыстау облысындағы №13 теміржол айырымында 1983 жылы туған станса кезекшісі өмір белгілерінсіз табылған.
Бұл ақпаратты Полиция департаментінің баспасөз қызметі растады.
– Теміржол ұйымы қызметкерінің кенеттен қайтыс болу фактісі бойынша Маңғыстау стансасындағы көліктегі полиция бөлімі қылмыстық іс қозғады, – деп хабарлады ведомство.
Алдын ала мәлімет бойынша, қызметкердің өліміне созылмалы жүрек ауруы себеп болуы мүмкін.
Қазір қажетті тергеу амалдары жүргізіліп жатыр. Қылмыстық-процестік кодекстің 201-бабына сәйкес өзге ақпарат жария етілмейді.
Оқиға орнына жедел жәрдем бригадасы мен полиция қызметкерлері шақырылған. Дәрігерлер келген кезде қызметкердің қайтыс болғанын тіркеген.
