Бірнеше сырқаты бар жүргізуші мектеп директорының жақын туысы болып шыққан, деп хабарлайды inbusiness.kz сайты.
Тағы бір сорақы жайт, оның көлік басқару құқығы да болмаған.
– Аталған азамат – психоневрологиялық ауру бойынша диспансерлік есепте тұрады (жеңіл дәрежедегі ақыл-ой кемістігі), бала кезінен мүгедек, сондай-ақ есту қабілеті бойынша екінші топтағы мүгедек. Бұған қоса, заңды күшіне енген сот шешімімен ол жүргізуші куәлігінен айырылып, көлік құралдарын басқару құқығы болмаған, – делінген хабарламада.
Осындай жағдайларға көз жұма қараған Қаражал қаласындағы мектептің директоры туысын ресми түрде жүргізуші ретінде жұмысқа алған. Прокуратураның дерегінше, ол "ПАЗ-423470" маркалы мектеп автобусын тізгіндеп, 129 оқушыны тасымалдаған.
– Бұл адам – мектеп директорының жақын туысы. Сондықтан, мүдделер қақтығысы бар. Мектеп директорына қатаң тәртіптік жаза берілді, ал жүргізуші жұмыстан шықты, – деп хабарлайды прокуратура.
