2021 жылы еліміздің мемлекеттік қарызы 20,6 триллион теңге болды. Бұл туралы қаржы министрі Ерұлан Жамаубаев айтты, деп хабарлайды inbusiness.kz тілшісі.
"2021 жылдың 1 қаңтарында мемлекеттік қарыз 20,6 трлн теңге немесе ЖІӨ-ге 29,6%. Бұл белгіленген лимиттен 50% аспайды. Мемлекеттік қарыз құрылымындағы борыштың 80%-ы үкіметтікі: 16,7 трлн теңге немесе ЖІӨ-ге 23,9%",– деді ол Қаржы министрлігінің алқа отырысында.
Оның айтуынша, 2020 жылы республикалық бюджет тапшылығы 2,2 трлн теңге немесе ЖІӨ-ге 3,1% болған.
"Өткен жылы 3 трлн теңгеге қарыз алынды. Оның ішінде ішкі нарыққа тартылған қарыздың көлемі – 2,8 трлн теңге. Алайда бұрын алынған қарыздарды өтеу керегі ескерілді. Ең төменгі валюталық тәуекелді, тартымды мөлшерлемені, сондай-ақ ішкі нарықтың шектеулі ресурстарын ескере отырып, 223 миллиард теңгеге рубль облигациясы шығарылды", – деді министр.
Айта кетейік, осыған дейін Қаржы министрі 2020 жылы мемлекеттік бюджетке қанша кіріс түскенін айтқан еді.
Дәурен Ерболат
