Төтенше жағдайлар министрі Шыңғыс Әрінов Сенатта өткен Үкімет сағатында ықтимал су тасқынын жою тәсілі қайта қаралғанын жеткізді, деп хабарлайды inbusiness.kz сайты.
"Бірінші кезекте, біз қауіпті учаскелерге мониторинг жүргізіп, төнген қатерге дереу ден қоямыз. Аталған тәжірибе өрт қауіпті кезеңде қолданылған болатын. Осылайша Стратегиялық жоспарлаудың және шұғыл басқару командалық орталығы құрылды. Оның негізінде техногендік және табиғи апаттарды болжау, модельдеу және талдау үшін бірқатар цифрлық сервистер біріктірілді. Олардың бірі су тасқынын болжау және модельдеу жүйесі – "TASQYN". Жалпы, бұл жүйе су шығындарының және өзендердің деңгейі ұзақ және қысқа мерзімді кезеңге болжамын бере алады", – деді ол Сенатта жасаған баяндамасында.
ТЖМ мамандары мен мүдделі мемлекеттік органдар күн сайын қар деңгейі, өзендердің жай-күйі және ауа райы жағдайлары туралы деректерді талдайды. Бұл ықтимал қауіпті учаскелерді ерте анықтауға, өзгерістерге жедел ден қоюға және алдын алу шараларын қабылдауға, сондай-ақ халықты уақтылы хабардар етуге мүмкіндік береді, дейді Шыңғыс Әрінов.
"Өңірлердегі арнайы және инженерлік техникалардың дайындығы "Көктем" республикалық командалық-штабтық оқу-жаттығулары шеңберінде де тексеріледі. Алдағы су тасқыны кезеңіне жедел дайындық мақсатында азаматтық қорғау қызметтерінен жеке құрамның жалпы саны 37 мыңнан астам адам, 13 мыңнан астам техника, 4 096 су айдау және 640 жүзу құралы бар күштер топтамасы құрылды. Министрліктің аумақтық бөлімшелерінен қосымша резервтік топтары дайындалды. Жалпы министрліктің құтқарушылары кез келген төтенше жағдайлар мен оқиғаларға ден қоюға дайын", – деді ТЖМ басшысы.
Айта кету керек, осыған дейін Қазақстанда 1 223 елді мекен су басу қаупі бар аймақта орналасқанын жазған болатынбыз. Бұл туралы Төтенше жағдайлар министрі Шыңғыс Әрінов айтты.
