Білім және ғылым министрі Асхат Аймағамбетов Әл-Фараби атындағы Қазақ ұлттық университетіндегі жер учаскесінің 0,779 гектарға азайғанын растады, деп хабарлайды inbusiness.kz порталы parlam.kz сайтына сілтеме жасап.
Оның айтуынша, министрлік Әл-Фараби атындағы Қазақ ұлттық университетінің жер телімін түзетуге қатысты пост жариялағаннан кейін тез арада жұмыс тобын құрған. Олар ҚР Сыбайлас жемқорлыққа қарсы іс-қимыл агенттігімен бірлесіп, барлық фактіні тексеруді бастаған.
"Тексеру қорытындысы бойынша ҚазҰУ жер учаскесінің 0,779 гектарға азаю фактісі расталды", – деді Асхат Аймағамбетов депутаттардың сауалына берген жауабында.
"Алайда осы жылғы наурызда Республикалық бюджеттің атқарылуын бақылау жөніндегі есеп комитеті ҚазҰУ-ға аудит бастауына байланысты қолданыстағы заңнамаға сәйкес тексеріс жүргізу мүмкін емес. Сонымен қатар 2021 жылдың 10 ақпанынан бастап ҚазҰУ-ға жаңа басшылық тағайындағанын атап өткен жөн",– деді ведомство басшысы.
Еске салайық, осыған дейін әлеуметтік желіде Әл-Фараби атындағы Қазақ Ұлттық университетіне тиесілі жерлер жеке тұлғаға сатылыпты-мыс деген ақпарат тараған еді.
Кейін ҚазҰУ бұл мәселеге қатысты түсінік берген болатын.
