Қазақстанның халық әртісі, әнші Димаш Құдайберген Нью-Йорктегі Madison Square Garden сахнасында жеке концертін берді, деп хабарлайды inbusiness.kz сайты.
"Stranger" атты концерт 5 қазанда өтті. АҚШ-тың басты концерт залы әлемнің түкпір-түкпірінен келген көрермендерге лық толып, Димаш халықтың ыстық ықыласына бөленді. Бұл – отандық өнерпаздың Нью-Йоркте берген екінші концерті. Ол алғаш рет 2019 жылы бұл қаланы бағындырған болатын.
Концертте танымал хиттермен қатар, жаңа әндер де шырқалды. Димаш Қазақстанның мемлекеттік Әнұранын орындады. Әнші қазақтың қара домбырасын да ұмытпады. Ал Stranger атты ән қобыз бен виолончельдің әуенімен сүйемелденді.
Осылайша Димаш Құдайбергеннің әлемдік туры басталды. Санаулы күннен кейін оның Мехико қаласында концерті өтеді.
Айта кету керек, бұған дейін Димаш Құдайбергеннің әлемдік туры мигранттар мәселесіне назар аударатынын жазған болатынбыз.
