Батыс Қазақстан облысы әкімдігі үйінді астынан үшінші адамның денесі табылғанын мәлімдеді, деп хабарлайды Inbusiness.kz сайты.
Облыстық төтенше жағдайлар департаменті құлаған конструкция санының көп болуына байланысты жұмыстар қиындағанын айтты.
"Оқиға орнында ғимараттың қиындылары құтқарушылардың өміріне қауіп төндіріп отыр. Ғимаратты толықтай қирату жұмыстары жүргізіліп жатыр. БҚО төтенше жағдайлар департаменті, полиция, жергілікті атқарушы органдар мен жедел медициналық жәрдем күштерінен барлығы 190-нан аса адам және 50 техника жұмылдырылды. Оқиға орнында зардап шеккендер мен қайтыс болған адамдардың туғандарына психологиялық көмек көрсетіліп жатыр. БҚО ТЖД штабында 8 (7112) 55-40-88 нөмірі бойынша жедел желінің жұмысы жалғасып жатыр", - делінген ТЖД мәлімдемесінде.
Оралда 2024 жылғы 4 қаңтарға қараған түні газ жарылып, салдарынан Rizyq дәмханасының екі қабатты ғимараты опырылып құлады. Бұған дейін оқиға орнынан екі адамның мәйіті табылғанын хабарлағанбыз.
