Көп ұзамай Өзбекстанның Жызақ облысында елдің алғашқы АЭС-қа арналған реактор қондырғысының құрылысы іске асырыла бастайды, деп хабарлайды inbusiness.kz сайты.
– Алдағы күндері тарихи оқиға болады. Өзбекстанда атом электр станциясының алғашқы реактор қондырғысын және ядролық медицинаның көпсалалы орталығын салу бойынша бірлескен жобалардың іске асырылуына бастау беріледі, – делінген Өзбекстан президентінің сайтындағы мәлімдемеде.
Ш.Мирзиёевтің сөзінше, Орталық Азия елдері мен Ресей арасындағы энергетикалық ынтымақтастық аймақтың тұрақтылығы мен орнықтылығының маңызды факторы болып қала береді. Сондай-ақ, ол Душанбенің де, Мәскеудің де стратегиялық жобаларды – газ құбырларын және энергетикалық инфрақұрылымды дамыту бастамаларын бірлесе жүзеге асырып жатқанын еске салды.
Бұған дейін "Өзбек ағайын әлемде тұңғыш болып үлкен тәуекелге барғалы тұр" деген тақырыпта мақала жариялаған едік.
