Өзбекстанда кезекті президент сайлауы 2021 жылдың 24 қазанында өтеді. Бұл туралы ел парламентіндегі төменгі палатаның бірінші вице-спикері Акмаль Саидов хабарлады.
"Заң шығару палатасы дайындаған заң жобасына сәйкес, президент сайлауы желтоқсанның соңғы он күніндегі алғашқы жексенбісінде емес, 24 қазанда өтеді", – деді Саидов.
Өткен аптада парламенттің төменгі палатасы осы заң жобасын бірінші оқылымда мақұлдаған еді. Саяси доданың ертерек ұйымдастырылуы одан кейінгі саяси іс-шараларды кешіктірмеу үшін жасалып отыр.
Еске сала кетсек, соңғы сайлау Өзбекстанның бірінші президенті Ислам Каримовтың қайтыс болуына байланысты 2016 жылдың 4 желтоқсанында мерзімінен бұрын өткен еді. Оған республикадағы төрт саяси партияның үміткерлері қатысты. Саяси тартыста Либералдық-демократиялық партиясы ұсынған Шавкат Мирзиеев жеңіске жеткен болатын.
Өзбекстан президентінің өкілеттік мерзімі – бес жыл.
Табиғат Нұрболат
Фото: centralasia.media
