Петропавлда екінші жылу электр орталығының директоры мен бас инженері уақытша ұстау абақтысына қамалды, деп хабарлайды inbusiness.kz порталы СҚО прокуратурасына сілтеме жасап.
Ведомство дерегінше, қазіргі таңда Қылмыстық кодекстің 254-бабы ("Міндеттеріне адал қарамау") бойынша қылмыстық іс тергеліп жатыр.
Биыл 21 наурызда СҚО полиция қызметкерлері "2-ЖЭО" ЖШС директоры мен бас инженерін ұстап, қаладағы полиция басқармасының уақытша ұстау абақтысына қамады.
"Сотқа дейінгі тергеп-тексеру аясында бұл іс бойынша барлық мән-жайды анықтауға бағытталған тергеу әрекеттері жүргізіледі. Тергеу барысын облыс прокуроры мен полиция департаменті басшысы бақылауға алды", – деп жазылған облыстық прокуратура таратқан хабарламада.
Сондай-ақ ведомство бақылаушы органдардың қызметіне талдау жүргізілетінін, оның нәтижесі бойынша жауапты лауазымды тұлғалардың іс-әрекеттеріне баға берілетінін атап өтті.
Сонымен қатар құтқарушылар апат кезінде хабар-ошарсыз кеткен жұмысшы әйелді іздеп жатыр. Кеше облыстық прокуратура жұмысшыны іздестіру жұмыстары жүргізіліп жатқанын хабарлаған.
Еске салайық, 20 наурызда Петропавлда екінші жылу электр орталығының мұржасы құлаған еді.
