Петропавлда Жұмысшы кентіндегі жер үйлердің бірінде ерлі-зайыпты мен олардың 17 жасар ұлын өлтіріп кеткен, деп хабарлайды inbusiness.kz сайты Qazaqstаn Media сайтына сілтеме жасап.
Бұл туралы хабарлама полицейлерге 28 желтоқсан күні сағат 13:25-те келіп түскен.
Оқиға болған баспанаға жеткен тәртіп сақшылары үйден зорлық-зомбылықтың белгілері бар 3 жансыз денені анықтады.
Аталған факт ҚР ҚК 99-бабы 2-бөлігі 1-тармағы (Екі немесе одан көп адамды өлтіру) бойынша сотқа дейінгі тергеп-тексерулердің бірыңғай тізілімінде тіркелді.
"Солтүстік Қазақстан облысы полиция департаментінің қызметкерлері облыс орталығының 2 тұрғынын ізін суытпай ұстады. Күдіктілер Петропавл қаласы ПБ уақытша ұстау изоляторына қамалды. Қазіргі уақытта істің барлық мән-жайларын толық, жан-жақты және объективті зерттеуге бағытталған тергеу әрекеттері жүргізілуде. Іс облыстық прокуратура мен полиция департаментінің бақылауында. ҚР ҚІЖК-нің 201-бабына сәйкес сотқа дейінгі тергеп-тексеру деректері жария етілмейді", - делінген облыстық полиция департаментінің баспасөз қызметінің мәліметінде.
Еске салайық, бұған дейін Петропавлдағы жеке үйлердің бірінде бір отбасының үш адамын өлтіріп кеткенін жазған болатынбыз.
