Бүгінде арнайы комиссия жарылыс пен өрттен зардап шеккен пәтер иелеріне төленетін шығын мен өтемақы мөлшерін есептеп жатыр, деп хабарлайды inbusiness.kz тілшісі "Интерфакс-Қазақстан" агенттігіне сілтеме жасап.
Қала әкімдігі агенттік тілшісіне жарылыс болған бесқабатты үйде қалпына келтіру жұмыстары жүргізіліп жатқанын айтқан. Сондай-ақ бүгінде арнайы комиссия жарылыс пен өрттен зардап шеккен пәтер иелеріне төленетін шығын мен өтемақы мөлшерін есептеп жатыр. Ал жарылыстан зардап шеккендер ауруханада емделуде.
"Қазір 8 адам ауруханада жатыр. Ал жарылыстан зардап шеккен 10 жастағы бала ауруханадан шығуға дайындалуда", - деді облыс денсаулық сақтау басқармасының баспасөз қызметі "Интерфакс-Қазақстан" агенттігіне.
Басқарма өкілінің сөзінше, қазір жансақтау бөлімінде 2 адам жатыр, олардың жағдайы ауыр.
"Ер адамның жағдайы ауыр, ал қыздың жағдайы өте ауыр", - деді ол.
Айта кетейік, Петропавлда 21 ақпанда шамамен сағат 16.00-де бесқабатты үйдің бірінші қабатында газ баллоны жарылған еді. Салдарынан 2 адам қаза тауып, тағы 12 адам зардап шекті.
Оқиға орнына облыс орталығының барлық өрт сөндіру бөлімі мен облыс ТЖД Жедел-құтқару жасағы бөлімі барды. Бес қабатты үйден 120 адам эвакуацияланды. Олар мектепке орналастырылды.