Шымкентте Нұрай Серікбайдың өліміне қатысты іс бойынша сот жарыссөзі басталды. Мемлекеттік айыптаушы сотталушы Шерхан Аймаханды өмір бойына бас бостандығынан айыруды сұрады, деп хабарлайды inbusiness.kz сайты Otyrar.kz-ке сілтеме жасап.
"Сотталушы Шерхан Аймахан Қылмыстық кодекстің 99-бабы 2-бөлігінің 5-тармағымен ("Аса қатыгездiкпен жасалған адам өлтіру"), 125-1-бабының 1-бөлігімен ("Некеге тұруға мәжбүрлеу") және 115-1-бабымен ("Сталкинг") кінәлі деп танып, өмір бойына бас бостандығынан айыру жазасын тағайындауды, Қылмыстық кодекстің 125-1-бабының 1-бөлігі бойынша екі жыл мерзімге бас бостандығынан айыру жазасын тағайындауды, Қылмыстық кодекстің 115-1-бабымен 200 сағат мерзімге қоғамдық жұмыстарға тарту жазасын тағайындауды, Қылмыстық кодекстің 58-бабының 4-бөлігін ("Қылмыстық құқық бұзушылықтар жиынтығы бойынша жаза тағайындау") қолданып, түпкілікті өмір бойына бас бостандығынан айыру жазасын тағайындауды сұраймын", – деді прокурор сот отырысында.
Айта кету керек, бұған дейін Нұрай Серікбайдың ісі бойынша сот отырысына психиатр маманның онлайн қатысқанын жазғанбыз.
Психолог сотталушының қылмыс кезінде аффект жағдайында болмағанын айтты.
