/img/tv1.svg
RU KZ
Сәуле Қисықова қарттар үйінің коронавирус ошағына айналуына қатысты пікір білдірді

Сәуле Қисықова қарттар үйінің коронавирус ошағына айналуына қатысты пікір білдірді

Орталықтағы 35 қарт адам коронавирустан емделіп жатыр.

10 Сәуір 2020 17:44 288

Сәуле Қисықова қарттар үйінің коронавирус ошағына айналуына қатысты пікір білдірді

Ақмола облысының Целиноград ауданына қарасты Аққайың ауылында орналасқан «Шапағат» арнаулы медициналық әлеуметтік қызмет көрсету орталығының бір қызметкері мен 35 тұрғыны індет жұқтырған. Бұл туралы  Денсаулық сақтау министрлігінің қоғамдық денсаулық сақтау департаментінің директоры Мағрипа Ембергенова онлайн-брифингте айтты.

«16 наурызда карантин жарияланған кезде орталықта орташа жасы 75-ті құрайтын 148 адам қамқорлықта болған. Қызмет көрсетуші 74 адамның 50-і еңбек демалысы мен қашықтан жұмыс істеуге жіберілген болатын. Өкінішке қарай, 2 сәуірде 1947 жылы туған бір тұрғын қайтыс болды. Ал 6 сәуірде 1929 жылы туған тұрғын көз жұмды. Екеуінде КВИ белгілері байқалмаған, инфекция қайтыс болғаннан кейін бірақ анықталды. Осыған байланысты Ақмола облысын бойынша тауарлар мен қызметтердің сапасы мен қауіпсіздігін бақылау департаменті санитарлық-эпидемиологиялық тексеру жүргізді. Орталықтың тұрғындары мен қызметкерлерінен сынамалар алынды. Диагностика қорытындысы бойынша 36 адамның диагнозы расталды. Оның біреуі қызметкер. Барлық науқастар инфекциялық стационарға жатқызылды. Медициналық бақылау жүргізіп отырмыз», – деді ол. 

Нұр-Сұлтан қаласының қоғамдық денсаулық сақтау басқармасының басшысы Сәуле Қисықова қарттар үйінің індет ошағына айналуын еліміздің бас санитарлық дәрігері шығарған хаттаманың бұзылуы деп кесіп айтуға әлі ерте деген пікір айтты. 

«Хаттаманың сақталмауы деп айтуға әлі ерте. Мамандармен жұмыс жүргізіп жатырмыз. Тексерудің қорытындысы бойынша ақпарат береміз. Қазір ондағы тұрғындардың бәріне зерттеме жүргізіп жатырмыз. Науқастарға керекті ем көрсетіліп жатыр», – деді ол.

Есжан Ботақара

Сәуле Қисықова: Қытай дәрігерлеріне ақша төлемейміз

Қытайдан келген дәрігерлер 15 күнде еліміздің 3 қаласында көмек көрсетеді. 

10 Сәуір 2020 17:04 294

Сәуле Қисықова: Қытай дәрігерлеріне ақша төлемейміз

Коронавируспен күресте отандық мамандарға ақыл-кеңес айтып, тәжірибесімен бөлісу үшін арнайы келген қытайлық мамандар қызметі үшін ақша ала ма? Онлайн брифинг барысында Денсаулық сақтау министрлігі өкіліне осындай сауал қойылды. 

«Қазір Қытайдан келген мамандар Нұр-Сұлтан қаласындағы қонақүйге орналасып жатыр. Олар тәжірибесімен тегін бөліспек. Екі мемлекет басшылары телефон арқылы сөйлескенде осылай келіскен болатын. Соған сәйкес жұмыс атқарылып жатыр», – деді Сәуле Қисықова.

Ал Денсаулық сақтау министрлігінің қоғамдық денсаулық сақтау департаментінің директоры Мағрипа Ембергенова қытайлық мамандардың елімізде 15 күн болатынын, Алматы, Нұр-Сұлтан, Қарағанды қалаларының әрқайсында 5 күннен көмек көрсетінін айтты. 

Есжан Ботақара

«Шапағат» орталығында 34 қариядан коронавирус анықталды, екі адам қайтыс болды

Сондай-ақ орталықтың 1 қызметкері қауіпті індетті жұқтырған.  

09 Сәуір 2020 18:38 296

«Шапағат» орталығында 34 қариядан коронавирус анықталды, екі адам қайтыс болды

Ақмола облысындағы «Шапағат» арнаулы әлеуметтік қызмет көрсету орталығында 34 қарттан коронавирус анықталып, 2 адам індеттен көз жұмды, деп хабарлайды coronavirus2020.kz сайты.

«Ақмола облысы Жұмыспен қамтуды және әлеуметтік бағдарламаларды үйлестіру басқармасының «Шапағат» арнаулы әлеуметтік қызмет көрсету орталығы Нұр-Сұлтан қаласынан 5 км жерде, Целиноград ауданындағы Аққайың ауылында орналасқан. 16 наурыз күні карантин жарияланған уақытта Орталықта қамқорлыққа алынған 147 адам (азаматтардың орташа жасы – 75) болды. Сол жерде жұмыс істейтін 74 адамның 51-і демалыс пен қашықтан жұмыс істеуге жіберілген. 2 сәуір күні 1947 жылғы азамат қайтыс болды. 6 сәуірде 1929 жылы туған әйел адам өмірден өтті. Екеуінде де коронавирус белгілері болмаған, індет қайтыс болғаннан кейін анықталды», – делінген ақпаратта.

Осы оқиғаға байланысты Ақмола облыстық Қызметтер мен тауарларлың сапасы мен қауіпсіздігін бақылау департаменті санитарлық-эпидемиологиялық тексеру жүргізген.

«Байланыста болған адамдар анықталып, COVID-19-ды анықтау бойынша лабораториялық тексеру жүргізілді. Инфекция жұқтырғандармен қарым-қатынаста болуына байланысты барлық қызметкерлер мен қамқорлыққа алынған азаматтардан қан талдауы алынды. ПТР-зерттеу нәтижесі бойынша, 9 сәуір күні 35 адамға COVID-19 диагнозы қойылды (қамқорлыққа алынған 34 адам мен 1 қызметкер әйел)», – делінген таратылған мәліметте.

Бүгінде барлық науқас инфекциялық стационарға оқшауландырылды. Бекітілген хаттамаға сәйкес ем алып жатыр. Олармен байланыста болған адамдарды анықтау және медициналық бақылау жұмыстары жалғасуда.

2020 жылдың 9 сәуірі күнгі мәлімет бойынша, Ақмола облысында 56 адамның COVID-19 жұқтырғаны расталды:

1. Целиноград ауданы – 51 жағдай;

2. Аршалы ауданы – 3 жағдай;

3. Көкшетау қаласы – 1 жағдай;

4. Шортанды ауданы – 1 жағдай.