Шығыс Қазақстан облысы Глубокое ауданындағы кеніште топырақ астында қалған екінші жұмысшы аман-есен шығарылды.
Глубокое ауданы Алтай кентіндегі кеніште топырақ астында қалған жұмысшыны құтқару үшін ШҚО Төтенше жағдайлар департаментінің бастығы Ерғали Бахаев пен апаттық-құтқару жұмыстарын жүргізу бойынша арнайы қызметтер өзара бірлесіп әрекет етті. 32 жастағы жұмысшы сағат 19.00 шамасында аман-есен топырақ астынан шығарылды.
"Тау-кен құтқарушылары мен Апаттар медицинасы орталығының дәрігерлері ер адамды алып шықты. Қазір оның денсаулығын тексеріп, қажетті көмек көрсетіп жатыр", – деп хабарлады облыстық Төтенше жағдайлар департаментінің баспасөз қызметінен.
Осы ретте, департамент бастығы Ерғали Бахаев құтқару іс-қимылдары барысында үйлесімді жұмыс істеген барлық қызметтердің өкілдеріне алғысын білдірді.
Еске салсақ, бүгін ШҚО-дағы кеніште екі жұмысшы топырақ астында қалды. Оның бірі Глубокое ауданындағы ауруханаға жеткізілген болатын.
