/img/tv1.svg
RU KZ
Шымкентте жаяу жүргіншіні қағып кеткен жүргізуші ұсталды

Шымкентте жаяу жүргіншіні қағып кеткен жүргізуші ұсталды

Полицейлер күдіктіні екі күннен соң Шымкенттегі жалдамалы пәтерлердің бірінен құрықтады.   

27 Қыркүйек 2020 11:34 237

Шымкентте жаяу жүргіншіні қағып кеткен жүргізуші ұсталды

 

Шымкент қалалық Полиция департаменті тергеу басқармасының бастығы Дәурен Абдрамановтың сөзінше, жаяу жүргіншіні қағып өлтірді деп күдікке ілінген көлік жүргізушісі Отырар ауданының тұрғыны болып шыққан. 
«Күдікті ұсталды. Ол Отырар ауданының 1990 жылғы тұрғыны болып шықты. Жұмыссыз, Шымкентте жалдамалы пәтерлердің бірінен табылды. Қазіргі таңда Қылмыстық кодекстің 345, 347-баптар бойынша іс қозғалды. Тергеу амалдары жүріп жатыр. Күдікті өз кінәсін толығымен мойындады», – деді тергеу басқармасының бастығы. 
Еске салсақ, жол апаты 22 қыркүйек күні кешкі сағат 22.20-лар шамасында Темірлан тас жолы бойында орын алған. Жаяу жүргіншілер жолағынан өтіп бара жатқан велосипед тізгіндеген азаматты қатты жылдамдықпен келе жатқан BMW көлігінің жүргізушісі қағып кеткен болатын. Салдарынан  1977 жылы дүниеге келген азамат оқиға орнында көз жұмды. Ал жүргізуші болса, көлігін тастап, оқиға орнынан бой тасалаған. Оның көлік апатын жасаған кезінде алкогольдік ішімдік ішкені немесе ішпегені тисті сараптама қорытындысынан соң белгілі болады. 
Жансая Тәуекелқызы ​

Кореяда сотталған жігіттің ісі қайта қаралуы мүмкін

Айыпталушы тарап сот шешімін аппеляцияға берді.  

13 Қаңтар 2020 21:19 247

Сыртқы Істер министрлігінің ресми өкілі Айбек Смадияров Оңтүстік Кореяда көлік апатын жасаған қазақстандықтың тағдырына қатысты ақпарат берді.  Күдікті сот шешімін қайта қарау үшін аппелцияға берген көрінеді.  Корея соты шешімді өзгертпеген жағдайда, Сыртқы істер министрлігі сотталғандарды беру процесін бастауы мүмкін.

«Оңтүстік Кореяда бала мыжып кетті деген айып тағылған  отандасымызға үкім шығарылған болатын. Ол 2,5 жылға қамауға алынған. Ол өз құқығын пайдаланып, сот шешімін қайта қарау үшін аппеляцияға берді. Кейбір БАҚ-та ол  шамамен 50 мың доллар айыппұл төлеуі тиіс деген ақпарат тараған. Бұл шындыққа жанаспайды.  Сот кезінде осындай сома айтылып қалған болатын.  Баланы емдеуге сонша қаражат кеткені айтылған.  Яғни, сот тек 2,5 жылға қамау туралы шешім шығарған.  Өзге қаржылық айыппұлдар туралы сөз болған жоқ», – деді СІМ өкілі.

Отандасымыз түбегейлі сотталған жағдайда Қазақстан Елшілігіне жазасын өз отанында өтеу туралы өтініш түсіруге құқылы.

«Соттың қайта шығаратын шешімін күтейік.  Содан кейін ғана айыпталушының не қалайтынын қараймыз.  Сотталғанды бізге беру процесін тек өзінің жеке өтініші бойынша ғана бастай аламыз.  Әзірге ол сол  шешімін аппеляцияға берді. Енді соттың шешімі шыққанша өтініш бере алмайды», – деді Айбек Смадияров.

Түркістан облысында көлік апатынан екі адам қайтыс болды

Түркістан облысының полицейлері жол қозғалысына қатысушылардың барлығын жол қауіпсіздік ережелерін қатаң сақтауды, жолда мұқият болуды ескертеді.  

27 Желтоқсан 2019 22:44 466

Бүгін таңғы сағат 6.30-да Ордабасы ауданы Көкарал ауылы ауданындағы Шымкент-Түркістан автожолының 67 шақырымында болған жол-көлік оқиғасы бойынша Түркістан облысы ПД-нің Тергеу басқармасы сотқа дейінгі тергеу жұмыстарын бастады, департаменттің баспасөз қызметі.
Жол-көлік оқиғасы болған жерге Түркістан облысы ПД мен аудандық полиция бөлімінің жедел терге тобы жетіп, бір бағытта жүріп бара жатқан "Хюндай Старекс" автокөлігінің жүргізушісі МТЗ тракторымен соқтығысқанын анықтады. Жол-көлік оқиғасының салдарынан "Хюндай Старекс"көлігінің екі жолаушысы оқиға орнында көз жұмды. 4 адам аудандық ауруханаға жеткізілді. Жүргізушіге және қалған 5 жолаушыға медициналық көмек көрсетілді.
ЖКО жайты бойынша ҚР ҚК 345-бабының 4 бөлігі бойынша сотқа дейінгі тергеу амалдары жүргізілуде. Сараптама тағайындалды. Жүргізуші қамауға алынды.