Солтүстік Қазақстан облысына қарасты Новоишимское ауылындағы "Ақ нан север" ЖШС аумағында өрт шықты, деп жазады inbusiness.kz Петропавловск.news порталына сілтеме жасап.
Облыстық ТЖД мәліметінше, 25 қазан күні сағат 01:22-де өрттың шыққаны туралы хабарлама келіп түсті. Өрт сөндірушілер оқиға орнына 7 минуттан кейін жетті.
Белгілі болғандай, металл астық кептіргіштегі 100 тонна болатын күнбағыс дақылы жанып жатты, қызыл жалын жақын маңда тұрған қазандыққа тараған. Салдарынан металл астық кептіргіш, қазандық шатыры, күнбағыс тұқымдары жанып кетті. Өрттің жалпы ауданы 274 шаршы метрді құрады.
Тілсіз жау сағат 07:19-да сөндірілді. Өртті сөндіруге екпінді жел кедергі жасаған.
Өртті жоюға ТЖ департаментінің 21 адамы мен 4 техникасы, сондай-ақ "Нан базасы" ЖШС ерікті өртке қарсы құралымының қызметкерлері және "ҚТЖ"АҚ өрт сөндіру поезы жұмылдырылды.
Алдын ала мәлімет бойынша өрттің шығуына технологиялық процестің бұзылуы әсер еткен. Абырой болғанда ешкім зардап шеккен жоқ.
